بوتاس يحتل صدارة ملبورن من الثانية الأولى!

فالتيري بوتاس على المنصة. مصدر الصورة: F1

أهم المقتطفات من سباق ملبورن:

وقفت حلبة ألبرت بارك في ملبورن الأسترالية دقيقة للحداد على روح ضحايا أحداث نيوزيلاندا، وحداد على روح تشارلي وايتينج مدير سباق فورميولا واحد اللي توفى ليلة السباق.

كتير من الملصقات على عربيات المتسابقين كان عليها كلمة “شكرا تشارلي” اللي كان محبوب جدا وسط كل العاملين في سباقات فورميولا وكل السواقين حتى الصغيرين منهم.

في السباق:

بوتاس أخد الصدارة من الثانية الأولى وخلص السباق بفرق أكتر من ٢٠ ثانية كاملة عن المركز التاني زميله في فريق مرسيدس لويس هاميلتون.

فيرستابين في عربية هوندا ريد بل أخد المركز الثالث بعد سباق ولا أروع مع فيتيل، دي أول مرة من سنة ٢٠٠٨ تكون فيها عربية بموتور هوندا في مقدمة السباق وأول وقوف لفيرستابين مع هوندا على المنصة. فيرستابين بعد كذا لفة بيحاول يتخطى فيتيل تخطاه أخيرا في اللفة ٣١ في منحنى ٣، وبكده أصبح على بعد ٣ ثواني من هاميلتون اللي فضل متمسك بالمركز التاني لحد آخر السباق.

فيتيل وليكريك في عربيات فيراري كانوا في المراكز الرابع والخامس بسبب استراتيجية إطارات وتوقف سمحت لفيرستابين إنه يتخطى فيتيل. في الوقت اللي فيتيل كان بيقول فيه إن العربية بطيئة.

ريكاردو الاسترالي الوحيد في السباق اللي بيتم على ارضه خرج من بدري بسبب كسر في الجناح الأمامي لعربيته الرينو تعرضلها وهو بيجازف بالعبور من عربية تانية.

في المراكز الوسطى كانت المبارزة ما بين كفيات في عربية تورو روسو هوندا وجازلي في عربية ريد بل هوندا انتهت بكفيات في المركز العاشر في الترتيب العام وخلفه مباشرة جازلي.

ألفا روميو تقدمت على الاتنين بقيادة رايكونين اللي خلص السباق في المركز التامن بعد ما بدأ من المركز التاسع، وبعد ما تسبب خطأ في الpit stop بتعطيله، أما المراكز السادس والسابع كانت من نصيب هاس ورينو.

السباق الأول في موسم فورميولا واحد كان غير متوقع، بوتاس حصل على لقب أفضل سائق، وعلق إن العربية ساعدته جدا وتغيير الإطارات في الوقت المناسب كان سبب في تمسكه بالمركز الأول طول السباق.

السباق اللي جاي يوم بين ٢٩ و٣١ مارس في البحرين.

منصة التتويج. مصدر الصورة F1
To follow or Like us:
error

Leave a Reply

Your email address will not be published. Required fields are marked *